Բժշկական ապահովագրությունը Գերմանիայում
Սկսած 2009 թ. ՝ յուրաքանչյուր անձ, ով մշտապես բնակվում է Գերմանիայի Դաշնային Հանրապետությունում, պետք է ունենա պարտադիր բժշկական ապահովագրություն: Բժշկական ապահովագրությունն անհրաժեշտ է նաև կարճաժամկետ այցով Գերմանիա մեկնելու համար, այլապես մուտքի արտոնագրի տրամադրումը կմերժվի:
Գերմանիայի բժշկական ապահովագրության համակարգի առանձնահատկությունները
Գերմանիայի բժշկական ապահովագրությունն իրենից ներկայացնում է երկակի համակարգ, որն առաջարկում է Պետական բժշկական ապահովագրություն (ՊԲԱ) և Մասնավոր բժշկական ապահովագրություն (ՄԲԱ): ՊԲԱ-ն մատչելի է յուրաքանչյուրի համար, մինչդեռ ՄԲԱ-ի համար գործում են որոշակի պայմաններ:
Եվրոպական տնտեսական գոտու¹ (ԵՏԳ) քաղաքացիները և այն երկրների քաղաքացիները, որոնց հետ առկա է Սոցիալական ապահովագրության համաձայնագիր², կարող են պահպանել իրենց երկրի բժշկական ապահովագրությունը: Այլ երկրների ապահովագրական ծառայությունները կարող են էապես տարբերվել Գերմանիայում առաջարկվող ծառայություններից: Այդ պատճառով, կարող է պահանջվել վճարում սեփական միջոցներով կամ լրացուցիչ ապահովագրության կնքում:
Պետական բժշկական ապահովագրություն (ՊԲԱ) և համերաշխության սկզբունք
Պետական բժշկական ապահովագրության վճարները կախված են եկամտից: Հիմք է ընդունվում համախառն եկամուտը որից գանձվում է 14,6 տոկոս ստանդարտ դրույքաչափով (2018թ. դրությամբ) գումար: Այս գումարը հավասարաչափ բաժանվում է ապահովագրված անձի և գործատուի միջև՝ յուրաքանչյուրին 7,3 տոկոսային հարաբերությամբ: Բացի այդ, բժշկական ապահովագրության յուրաքանչյուր ընկերություն գանձում է տարբեր լրացուցիչ վճարներ, որոնք վճարում է միայն աշխատողը: Ապահովագրավճարի հաշվարկման համար սահմանված եկամտային առավելագույն շեմը (2018թ. սկսած՝ ամսական 4425 եվրո) գերազանցելու դեպքում եկամուտը ապահովագրավճարի հաշվարկման համար որևէ դեր չի խաղում: Պետական բժշկական ապահովագրության դեպքում երեխաներն ու ամուսինը/կինը կարող են անվճար ապահովագրվել ընտանեկան ապահովագրության ծրագրով:
Որոշ խմբերի պատկանող անձինք պետք է դառնան Պետական բժշկական ապահովագրության անդամ: Այդ խմբերին են պատկանում.
Հաստիքային աշխատողները (համախառն եկամուտը պետք է պարտադիր ապահովագրության համար սահմանված եկամտային շեմից ցածր լինի)
Թոշակառուները (եթե լրացել է կամավոր ապահովագրության վերանայման ժամկետը)
I կարգի գործազրկության նպաստ ստացողները
Մասնավոր բժշկական ապահովագրությամբ տրամադրվող անհատական ծառայություններ
Ոչ բոլորը կարող են դառնալ Մասնավոր բժշկական ապահովագրության (ՄԲԱ) անդամ: Աշխատողները կարող են ապահովագրվել ՄԲԱ-ով, եթե նրանց համախառն եկամուտը բարձր է պարտադիր ապահովագրության համար սահմանված եկամտային շեմից (2018թ. սկսած՝ ամսական 4950 եվրո): Համապատասխանող անձինք պետք է ներկայացնեն դիմում՝ պարտադիր ապահովագրությունից ազատվելու համար: Հաճախ մասնավոր բժշկական ապահովագրության ծրագրերով պահանջվում է Գերմանիայիում մշտական բնակություն ունենալու նվազագույն ժամկետ: Օտարերկրացի ապահովադիրները պետք է ներկայացնեն իրենց երկարաժամկետ ապահովագրությունը հաստատող փաստաթղթեր: Ապահովագրական մի շարք մասնավոր ընկերություններն այս խմբի համար առաջարկում են հատուկ սակագներ, որոնք համապատասխանեցված են նրանց կարիքներին ու կացության տևողությանը:
Բժշկական ապահովագրության դիմում ներկայացնելիս տրվում են առողջական վիճակի վերաբերյալ մանրամասն հարցեր (առողջական վիճակի ստուգում): Գերմանական ապահովագրական ծածկույթը դադարում է գործել, եթե ապահովադիրը վերադառնում է հայրենիք:
Հաճախակի մասնավոր ապահովագրվողների թվին են պատկանում հետևյալ խմբերի ներկայացուցիչները.
Հաստիքային աշխատողներ (համախառն եկամուտը բարձր է պարտադիր ապահովագրության համար սահմանված եկամտային շեմից)
Քաղծառայողներ
Անհատ ձեռներեցներ և ինքնազբաղվածներ
Մասնավոր բժշկական ապահովագրության վճարները կախված չեն եկամտից և սահմանվում են՝ ելնելով առողջական վիճակից, տարիքից ու տրամադրվող ծառայությունից: Յուրաքանչյուր ապահովագրվողի համար ապահովագրավճարները սահմանվում են անհատականորեն:
ՄԲԱ-ի ծառայությունների փաթեթը գրեթե ենթակա չէ պետական կանոնակարգերի պահանջներին և շատ ավելի ծավալուն է կազմված, քան պետականը: Բացի այդ, ծառայությունները կարող են համապատասխանեցվել ապահովագրվող անձին: Բուժման բոլոր ծախսերը ապահովագրված անձը վճարում է նախապես: Ապահովագրությունը հատուցում է այդ ծախսերը անդորրագիրը ներկայացնելու դեպքում (ծախսերի հատուցման սկզբունք):
Լրացուցիչ կամավոր ապահովագրություններ
Լրացուցիչ կամավոր ապահովագրությունները նախատեսված են բժշկական ապահովագրությամբ չտրամադրվող ծառայությունները լրացնելու համար: Ապահովագրումն իրականացվում է մասնավոր ապահովագրական ընկերության կողմից՝ անկախ եկամտի չափից: Կարևոր լրացուցիչ ապահովագրություններից են օրինակ տնային խնամքի լրացուցիչ ապահովագրությունը, ատամնաբուժական լրացուցիչ ապահովագրությունը կամ հիվանդանոցային բուժման լրացուցիչ ապահովագրությունը:
Արտասահմանցի ուսանողների բժշկական ապահովագրումը Գերմանիայում
Արտասահմանցի բոլոր ուսանողները, ովքեր սկսում են իրենց մասնագիտական ուսումը գերմանական որևէ համալսարանում կամ բուհում, պետք է պարտադիր ունենան բժշկական ապահովագրություն: Առանց բժշկական ապահովագրությունը ներկայացնելու նրանք չեն կարող սկսել ուսումը:
Ուսանողների պարտադիր ապահովագրություն Գերմանիայում
Գործող պայմանները տարբեր են՝ կախված ուսանողի կացության նպատակից, հայրենիքից և տարիքից: Հիմնականում տարբերում են ուսանողների հետևյալ հինգ խմբեր՝
1 Ուսանողներ ԵՏԳ պետություններից¹ կամ Գերմանիայի հետ Սոցիալական ապահովագրության համաձայնագիր կնքած պետություններից²
2 Ուսանողներ մյուս բոլոր պետություններից
3 Ուսանողներ, ում տարիքը 30-ից բարձր է կամ ովքեր ավարտել են ուսման 14-րդ կիսամյակը
4 Ուսմանը նախապատրաստող լեզվի դասընթացների մասնակիցներ
5 Արտասահմանցի դոկտորանտներ և կրթաթոշակակիրներ
Բժշկական ապահովագրություն մինչև 30 տարեկան / ուսման 14-րդ կիսամյակն ավարտած ԵՄ քաղաքացիների համար
ԵՏԳ պետությունների¹ և Սոցիալական ապահովագրության համաձայնագիր կնքած պետությունների² ուսանողները կարող են ներկայացնել փաստաթուղթ իրենց հայրենիքում ստացած բժշկական ապահովագրության վերաբերյալ և ազատվել Գերմանիայում պարտադիր բժշկական ապահովագրություն ունենալու պարտավորությունից.
| Բժշկական ապահովագրություն հայրենիքում | Ապահովագրության հնարավորություններ Գերմանիայում | Լրացուցիչ պայմաններ |
|---|---|---|
| Պետական բժշկական ապահովագրություն | Ճանաչում պետական բժշկական ապահովագրության որևէ ծրագրի կողմից | Հայրենիքում ապահովագրական ընկերության կողմից տրամադրված Եվրոպական բժշկական ապահովագրության քարտ (անգլ.՝ European Health Insurance Card – EHIC) |
| Մասնավոր բժշկական ապահովագրություն | Մասնավոր բժշկական ապահովագրություն | Հայրենիքում տրամադրված ապահովագրավճարի հաստատում Ծառայությունների ու դեղամիջոցների արժեքի փոխհաշվարկ տեղական բժշկական ապահովագրության ընկերության հետ |
| Առանց բժշկական ապահովագրության | Պետական կամ Մասնավոր բժշկական ապահովագրություն | 30-ից բարձր տարիքի դեպքում հնարավոր է միայն մասնավոր ապահովագրություն |
Ուշադրություն. Արտասահմանցի ուսանողները, ովքեր ունեն մասնավոր ապահովագրություն, սակայն դեռևս 30 տարեկան չեն, բուհ ընդունվելիս պետք է հաճախակի ներկայացնեն Պետական բժշկական ապահովագրությունից ազատվելու տեղեկանք: Դրանից հետո ուսման ընթացքում ՊԲԱ-ում ընդգրկվել այլևս հնարավոր չէ:
Պարտադիր բժշկական ապահովագրություն ոչ ԵՄ քաղաքացիների համար
Գերմանիայում մյուս բոլոր պետությունների ուսանողները իրենց կացության ժամանակահատվածի համար պետք է ունենան պետական կամ մասնավոր բժշկական ապահովագրություն: 30 տարեկանից բարձր կամ ուսման 14-րդ կիսամյակն ավարտած ուսանողները Գերմանիայում պետական ապահովագրություն չեն ունենում, նրանք պետք է մասնավոր ապահովագրություն ստանան: Նույնը կիրառելի է նաև այն անձանց համար, ովքեր Գերմանիայում մասնակցում են ուսմանը նախապատրաստող լեզվի դասընթացների:
Պետական բժշկական ապահովագրության վճարներ (2018թ. դրությամբ)
| Ապահովագրություն արտասահմանցի ուսանողների համար | Բժշկական ապահովագրության վճար | Խնամքի ապահովագրության վճար | Ընդամենը վճարներ |
|---|---|---|---|
| Երեխա չունեցող ուսանողներ (23 տարեկանից բարձր) | 66,33 եվրո* | 18,17 եվրո** | 84,50 եվրո* |
| Մինչև 23 տարեկան կամ երեխա ունեցող ուսանողներ | 66,33 եվրո* | 16,55 եվրո** | 82,88 եվրո* |
*Պետական ապահովագրության վճարները արտասահմանցի ուսանողների համար բժշկական ապահովագրության բոլոր գործակալություններում նույնն են: Դրան ավելանում է տվյալ գործակալի կողմից սահմանված անհատական լրացուցիչ վճարը:
**Խնամքի ապահովագրության վճարները երեխա ունեցող ուսանողների համար կազմում են 2,55 %, 23 տարեկանից բարձր երեխա չունեցող ուսանողների համար՝ 2,80%:
Նախքան ուսումը սկսելը արտասահմանցի ուսանողները պետք է դիմեն ուսանողների շահերի պաշտպանության իրավասու կազմակերպությանը կամ օտարերկրացի քաղաքացիների հարցերով զբաղվող ակադեմիական կազմակերպությանը (միջազգային գրասենյակ)՝ խորհրդատվություն ստանալու համար:
Աշխատելը Գերմանիայում – Բժշկական ապահովագրություն օտարերկրացի աշխատողների համար
Գործում է հետևյալ հիմնական պայմանը՝ աշխատողը սոցիալապես ապահովագրված է այն երկրում, որում նա աշխատում է: Անգամ աշխատանքի նպատակով կարճաժամկետ կացության դեպքում անհրաժեշտ է ձեռք բերել գերմանական բժշկական ապահովագրություն:
Բժշկական ապահովագրությունը ԵՄ քաղաքացիների համար
ԵՏԳ անդամ պետություններից¹ և Գերմանիայի հետ Սոցիալական ապահովագրության համաձայնագիր² կնքած պետություններից եկած աշխատողները Գերմանիայում պետք է ունենան բժշկական ապահովագրություն՝ անկախ այն բանից, թե ինչ հիմունքներով են նրանք աշխատում՝ հաստիքային աշխատող են, թե զբաղվում են անհատ ձեռներեցությամբ: Նույնը գործում է նաև այն դեպքում, երբ աշխատողը բնակվում է մեկ այլ անդամ պետությունում, կամ գործատուի գրասենյակը մեկ այլ անդամ պետությունում է: Գործում է ընդամենը երկու բացառություն.
1
Անձը հանդիսանում է աշխատող մի անդամ պետությունում և միաժամանակ անհատ ձեռներեց է մեկ այլ անդամ պետությունում ⇢ Սոցիալական ապահովագրությունը հնարավոր է կատարել երկու պետություններից որևէ մեկում
2
Ժամանակավոր գործուղում արտասահման (առավելագույնը 12 ամիս) ⇢ Բժշկական ապահովագրությունը հայրենիքում (անհրաժեշտ է լրացնել E 101 ձևաթուղթը)
Բժշկական ապահովագրությունը ԵՄ քաղաքացի չհանդիսացող անձանց համար
Անկախ կացության ժամկետից՝ ԵՄ քաղաքացի չհանդիսացող աշխատողները պարտադիր պետք է ունենան գերմանական բժշկական ապահովագրություն, եթե նրանք աշխատանքի թույլտվությունից բացի կարող են ներկայացնել կացության թույլտվություն: Երրորդ երկրների քաղաքացիներն այս թույլտվությունն ստանալու համար կարող են դիմել տվյալ երկրում Գերմանիայի հյուպատոսություն կամ Գերմանիայում օտարերկրացիների հարցերով զբաղվող մարմնին:
Աշխատելը և գիտական հետազոտությամբ զբաղվելը Գերմանիայում – Բժշկական ապահովագրություն օտարերկրացի աշխատողների ու գիտնականների համար
Կարգ օտարերկրացի գիտնականների համար
Բժշկական ապահովագրությունը պարտադիր է նաև օտարերկրացի գիտնականների (գիտահետազոտողներ) և նրանց ուղեկցող ընտանիքի անդամների համար: Այդ պատճառով երրորդ երկրների քաղաքացիների համար խիստ անհրաժեշտ է տեղեկանալ ապահովագրության հնարավորություններին նախքան մեկնելը, քանի որ կացության թույլտվությունը տրամադրվում է միայն բժշկական ապահովագրություն ներկայացնելու դեպքում: Օրենսդրական պահանջները համառոտ ստորև.
| Քաղաքացիություն/Կացության տեսակ | Բժշկական ապահովագրության կարգ |
|---|---|
| Օտարերկրացի գիտնականներ ԵՏԳ պետություններից1 և Սոցիալական ապահովագրության համաձայնագիր կնքած պետություններից2 | Հայրենիքում ստացած բժշկական ապահովագրությունը գործում է նաև Գերմանիայիում (European Health Insurance Card)
Պահանջվում է հայրենիքում բժշկական ապահովագրության գործակալի կամ սոցիալական ապահովագրության մարմնի կողմից տրամադրած թիվ 1 կամ 101 ձևաթուղթը |
| Օտարերկրացի գիտնականներ, ովքեր բնակվում են Գերմանիայում (երկարաժամկետ կացություն) | Պարտադիր բժշկական ապահովագրություն, որը տրամադրվել է Գերմանիայում թույլատրված որևէ ապահովագրական ընկերության կողմից
հայրենիքում ձեռք բերած բժշկական ապահովագրությունը Գերմանիայում բնակվելու ժամանակահատվածի համար կարող է վերաձևակերպվել կենսաթոշակային ապահովագրության սակագնով |
| Օտարերկրացի գիտնականներ աշխատանքային պայմանագրով | անհրաժեշտ է պարտադիր գերմանական բժշկական ապահովագրություն Պետական կամ Մասնավոր բժշկական ապահովագրության ծրագրերից որևէ մեկով |
| Օտարերկրացի գիտնականներ կրթաթոշակով | հնարավոր է միայն Մասնավոր բժշկական ապահովագրություն |
Ներգաղթյալների բժշկական ապահովագրումը Գերմանիայում
Անձինք, ովքեր ցանկանում են ներգաղթել Գերմանիա և այդպիսով նպատակ ունեն հաստատել երկարատև կացություն, պետք է ձեռք բերեն բժշկական ապահովագրություն: Այլապես Գերմանիայի մուտքի արտոնագրի տրամադրումը կմերժվի:
Կացության իրավունք ԵՄ քաղաքացիների համար
Ընդհանուր առմամբ, Եվրոպական Միության որևէ անդամ պետության քաղաքացիներն իրավունք ունեն ապրելու ցանկացած ԵՄ երկրում, անգամ եթե նրանք այնտեղ չեն աշխատում: Կացության իրավունքը սակայն կախված է երկու պայմանից.
1
Ներգաղթյալները պետք է ապացուցեն, որ ունեն բավարար «միջոցներ ապրելու համար», որպեսզի կարողանան վճարել տվյալ ԵՄ երկրում իրենց ապրուստի ծախսերը
2
Բժշկական ապահովագրության կնքում «նոր» ԵՄ երկրում
Կարգ ոչ ԵՄ պետությունների քաղաքացիների համար
Այն երկրներից ներգաղթողները, ովքեր Գերմանիա մուտք գործելու համար ունեն արտոնագրի կարիք, պետք է արդեն իսկ այդ պահին ներկայացնեն բժշկական ապահովագրության վկայագիր: Թե՛ Պետական, թե՛ Մասնավոր բժշկական ապահովագրության համար գործում են տարբեր պայմաններ, որոնք կախված են այն բանից՝ արդյո՞ք ներգաղթյալը աշխատելու է, թե ոչ:
Հատուկ կանոնակարգ Գերմանիայից ապաստան հայցողների համար
Հատուկ կարգավիճակ ստանում են այն անձինք, ովքեր Գերմանիայից խնդրում են պաշտպանություն քաղաքական կամ այլ տիպի հետապնդումներից: Ապաստան փնտրողները հիմնականում Պետական բժշկական ապահովագրությամբ չեն ապահովագրվում: Հիվանդության դեպքում նրանք ստանում են ծառայություններ Ապաստան հայցողներին տրամադրվող սոցիալական ապահովության ծառայությունների մասին օրենքի համաձայն (AsylbLG): Կախված կացության կարգավիճակից և տևողությունից՝ օրենքը սահմանում է ծառայությունների տարբեր մակարդակներ:
AsylbLG օրենքի § 4-ի համաձայն տրամադրվող ծառայությունները հետևյալն են.
սուր հիվանդությունների դեպքում՝ բուժօգնություն, ներառյալ դեղամիջոցներն ու վիրակապերը, ինչպես նաև առողջացմանն ուղղված այլ ծառայություններ
խնամք և բժշկական օգնություն, ներառյալ մանկաբարձուհու ծառայություններ և դեղամիջոցներ ու վիրակապային նյութեր, հղիների ու հետծննդյան շրջանում գտնվող կանանց համար
Պրոֆիլակտիկ հետազոտություններից և կանխարգելիչ պատվաստումներից օգտվելու իրավունք
Գերմանական բժշկական ապահովագրություն աշակերտների, պրակտիկանտների և օտարերկրացի դայակների համար
Գերմանիայում փոխանակման ծրագրերով գտնվող աշակերտները, օտարերկրացի պրակտիկանտները, ինչպես նաև որպես դայակ աշխատող օտարերկրացիներն իրենց կացության ժամանակահատվածի համար պետք է ներկայացնեն բժշկական ապահավոագրություն և ապահովագրություն դժբախտ պատահարներից: Օտարերկրացի պրակտիկանտներն ու դայակները կարող են ունենալ միայն պետական բժշկական ապահովագրություն, եթե նրանք ամսական վաստակում են 450 եվրոյից ավելի: Սակայն նրանք կարող են կնքել նաև Մասնավոր բժշկական ապահովագրություն, որը հատուկ համապատասխանեցված է Եվրոպական տնտեսական գոտու,¹ ինչպես նաև Սոցիալական ապահովագրության համաձայնագիր կնքած պետություններից² ժամանած հյուրերի ու այցելուների կարիքներին:
Բժշկական ապահովագրություն հայրենիքում, թե՞ Գերմանիայում
ԵՏԳ-ի¹ այցելուները Գերմանիայում կարող են բուժօգնություն ստանալ Եվրոպական բժշկական ապահովագրության քարտի (EHIC) միջոցով: Եթե հայրենի երկիրը Գերմանիայի հետ կնքել է Սոցիալական ապահովագրության համաձայնագիր,² որը ներառում է բժշկական ապահովագրության կանոնակարգի պահանջները, ապա այդ երկրների քաղաքացիները կարող են որոշակի հանգամանքներում դիմել՝ Գերմանիայում բուժօգնության ծառայություններ ստանալու համար: Ծառայությունների շրջանակը սահմանվում է ըստ համապատասխան համաձայնագրի: Եթե հայրենի երկիրը ԵՏԳ¹ անդամ չէ, և Սոցիալական ապահովագրության համաձայնագիր² առկա չէ, պետք է կնքվի Մասնավոր բժշկական ապահովագրություն: Օտարերկրացի դայակների դեպքում ՄԲԱ-ի և դժբախտ պատահարներից ապահովագրման ծախսերը վճարում է հյուրընկալող ընտանիքը:
Տարիքային սահմանափակումներ դայակների համար.
Որպես կանոն՝ 18-ից 27 տարեկան
Դիմում մուտքի արտոնագրի համար՝ 18-ից 26 տարեկան
Ոչ ԵՄ պետությունների քաղաքացիներ՝ 18-ից 24 տարեկան
Ապահովագրության առավելագույն ժամկետ՝ 12 ամիս
Խորհուրդ է տրվում ստանալ անկախ խորհրդատվություն հայրենիքում արտասահմանում կացություն հաստատելուց առաջ կամ՝ կացության երկրում: Դա կարելի է անել օրինակ իրավասու օտարերկրյա ներկայացուցչությունում, օտարերկրացիների հարցերով զբաղվող իրավասու մարմնում կամ հենց ապահովագրական ընկերությունում:
Ուշադրություն. Յուրաքանչյուր ընկերության կողմից առաջարկվող սակագները և ծառայությունները տարբեր են, այդ պատճառով գներն ու ծառայությունները պետք է նախապես մանրակրկիտ ուսումնասիրել: Բացի այդ, գործում են հատուկ սակագներ այն անձանց համար, ովքեր Գերմանիայում են գտնվում «Աշխատանք և զբոսաշրջություն» ծրագրերի շրջանակում:
Օգտակար ցուցումներ Գերմանիայում գտնվող օտարերկրացիների համար
Ի՞նչ անել շտապ օգնության անհրաժեշտության դեպքում: Երբ որևէ արտակարգ իրավիճակում անհրաժեշտ է շտապ բուժօգնություն, կարևոր է իմանալ, թե ում կարելի է դիմել և ինչպես ստանալ անհրաժեշտ օգնությունը:
1. Կարևոր հեռախոսահամարներ արտակարգ իրավիճակների համար
Եթե անհրաժեշտ է շտապ և անհետաձգելի բուժօգնություն, կամ հայտնվել եք որևէ այլ արտակարգ իրավիճակում, անհրաժեշտ է իմանալ հետևյալ հեռախոսահամարները.
112 → Հերթապահ բժիշկ/ շտապ օգնություն և/կամ հրշեջ ծառայություն (գործում է ողջ Եվրոպայի տարածքում)
110 → Ոստիկանություն (Արտակարգ իրավիճակների բոլոր հեռախոսահամարներով զանգն անվճար է:)
2. Բժշկական հերթապահություն
Ընդունելության ժամերից դուրս բժշկական օգնություն ստանալու հնարավորություններ.
- 116117 → Պետպատվերով բուժող բժիշկների ասոցիացիա՝ Հեռ.
- Քաղաքային հիվանդանոցի կամ տեղական համալսարանական կլինիկայի անհետաձգելի բուժօգնության բաժանմունք
3. Դեղամիջոցներ և դեղատներ
Դեղամիջոցները հիմնականում ձեռք են բերվում դեղատներից: Գերմանիան ունի դեղատների շատ մեծ ցանց: Դեղատները նշված են մեծ, կարմիր «A» նշանով: Տարածված է նաև դեղամիջոցների պատվիրումը համացանցային դեղատների միջոցով: Սակայն պետք է տարբերել հետևյալը.
առանց դեղատոմսի դեղամիջոցներ ⇢ տրամադրվում են առանց բժշկի դեղատոմսի
դեղատոմսով դեղամիջոցներ (օր. հակաբիոտիկներ) ⇢ պահանջվում է նախնական բժշկական հետազոտություն և բժշկի դեղատոմս, ինչպես նաև հավելավճար
Շտապ օգնության դեպքերի համար Գերմանիայում գործում է հերթապահ դեղատնային ծառայություն: Մոտակա համապատասխան դեղատների հասցեները («հերթապահ դեղատուն») կարելի է գտնել թերթերի թարմ համարներում կամ յուրաքանչյուր դեղատան ցուցատախտակի վրա:
4. Խորհրդատվություն և օգնություն – Օգտակար հղումներ
| Կրթական հաստատություններ | Հասցե |
|---|---|
| Արտաքին գործերի նախարարություն (գերմ.՝ Auswärtiges Amt) | www.auswaertiges-amt.de |
| Միգրացիայի ու փախստականների հարցերով զբաղվող վարչություն (գերմ.՝ Bundesamt für Migration und Flüchtlinge) | www.bamf.de |
| Օտարերկրացիների հարցերով զբաղվող դաշնային լիազոր ներկայացուցիչ (գերմ.՝ Bundesauslaenderbeauftragte) | www.bundesauslaenderbeauftragte.de |
| Փախստականների հարցերով զբաղվող մարզային խորհուրդներ (գերմ.՝ Landesflüchtlingsräte) | www.fluechtlingsrat.de |
| Գերմանական ակադեմիական փոխանակման ծառայություն (գերմ.՝ Deutscher Akademischer Austauschdienst, DAAD) | www.daad.de |
| Գերմանիայի ուսանողների աջակցման միություն (գերմ.՝ Deutsches Studentenwerk (DSW) e.V.) | www.internationale-studierende.de |
| Բուհերի ռեկտորների խորհրդին աջակցող հիմնադրամ (գերմ.՝ Stiftung zur Förderung der Hochschulrektorenkonferenz) | www.hochschulkompass.de |
| Մշակույթի մարզային նախարարների մշտական խորհրդի քարտուղարություն (գերմ.՝ Sekretariat der Ständigen Konferenz der Kultusminister der Länder) Արտասահմանի կրթական համակարգի գնահատման կենտրոնական վարչություն (գերմ․ ՝Zentralstelle für ausländisches Bildungswesen) |
www.anabin.kmk.org |
| Գյոթեի ինստիտուտ (գերմ.՝ Goethe-Institut e. V.) | www.goethe.de |
| Բուհական կրթության նախապատրաստման և թեստերի մշակման կազմակերպություն (գերմ.՝ Gesellschaft für Akademische Studienvorbereitung und Testentwicklung e. V.) DaF թեստի ինստիտուտ (գերմ․ ՝ TestDaF-Institut) |
www.testdaf.de |
| Կրթության և գիտության դաշնային նախարարություն (գերմ.՝ Bundesministerium für Bildung und Forschung) | www.bmbf.de |
| Ապահովագրության դաշնային մարմին (գերմ.՝ Bundesversicherungsamt) | www.bundesversicherungsamt.de |
| Քաղաքական կրթության դաշնային կենտրոն (գերմ.՝ Bundeszentrale für politische Bildung, bpb) | www.bpb.de |
| Գերմանիայում օտարերկրացիների բժշկական ապահովագրության հարցերով զբաղվող կենտրոն (գերմ.՝ Deutsche Verbindungsstelle Krankenversicherung – Ausland, DVKA) |
www.dvka.de |
| Առողջապահական հաստատություններ | Հասցե |
|---|---|
| Առողջապահության նախարարություն (գերմ.՝ Bundesministerium für Gesundheit, BMG) | www.bundesgesundheitsministerium.de |
| Առողջապահական տեղեկատվության դաշնային կենտրոն (գերմ.՝ Bundeszentrale für gesundheitliche Aufklärung, BZgA) | www.bzga.de |
| Առողջության պահպանման և խթանման դաշնային միություն (գերմ.՝ Bundesvereinigung für Prävention und Gesundheitsförderung e. V., BVPG) | www.bvpraevention.de |
| Գերմանիայում հիվանդների անկախ խորհրդատվական կենտրոն (գերմ.՝ Unabhängige Patientenberatung Deutschland, UPD) | www.patientenberatung.de/de |
| Գերմանական Կարմիր խաչ (գերմ.՝ Deutsches Rotes Kreuz, DRK) | www.drk.de |
| Դիակոնիա Գերմանիա (գերմ.՝ Diakonie Deutschland) | www.diakonie.de |
| Կարիտաս Գերմանիա (գերմ.՝ Caritas Deutschland) | www.caritas.de |
| Կամավոր բարեգործության դաշնային աշխատանքային խորհուրդ (գերմ.՝ Bundesarbeitsgemeinschaft der freien Wohlfahrtspflege, BAGFW) | www.bagfw.de |
| Գերմանիայում ՁԻԱՀ-ի աջակցման գրասենյակ (գերմ.՝ Deutsche AIDS-Hilfe) | www.aidshilfe.de |
| Թմրանյութերի օգտագործման դեմ պայքարի գերմանական կենտրոնական գրասենյակ (գերմ.՝ Deutsche Hauptstelle für Suchtfragen e.V., DHS) | www.dhs.de |
| Գերմանական STI կազմակերպություն (գերմ.՝ Deutsche STI-Gesellschaft e.V.) Սեռական առողջության խթանման կազմակերպություն (գերմ.՝ Gesellschaft zur Förderung der Sexuellen Gesundheit) |
www.dstig.de |
| Սննդի անվտանգության և հետազոտությունների գերմանական կազմակերպություն (գերմ.՝ Deutsche Gesellschaft für Ernährung e. V.) | www.dge.de |
| «Առողջ քաղաքներ» ցանց (գերմ.՝ Das Gesunde Städte-Netzwerk) | www.gesunde-staedte-netzwerk.de |
¹ ԵՄ-/ԵՏԳ պետություններ՝ ԵՄ անդամ պետություններ և Լիխտենշտայն, Նորվեգիա, Իսլանդիա + Շվեյցարիա
² Պետություններ, որոնք Գերմանիայի հետ կնքել են Սոցիալական ապահովագրության մասին համաձայնագիր՝ Բոսնիա-Հերցեգովինա, Ֆրանսիայի անդրծովյան տարածքներ (Ֆրանսիական Գվիանա, Գվադելուպա, Մարտինիկա, Մայոտ, Ռեյունյոն), Իսրայել³, Խորվաթիա, Մարոկկո, Մակեդոնիա, Մոնտենեգրո, Սերբիա, Թուրքիա և Թունիս
³ Համաձայնագիրը վերաբերում է բացառապես նոր ծննդաբերած մայրերին բժշկական ապահովագրության շրջանակում տրամադրվող օգնությանը: